Community

எது இன்பம் எது துன்பம்

அன்புள்ள கௌசல்யா !

நீ என்னுடன் இரண்டு நாட்கள் தங்கி யிருந்த போதே உன் முகத்தில் ஒருவிதமான ஆச்சரிய பாவம் குடி கொண்டிருந்ததை நான் பார்த்தேன் . ஆனால் அந்த ஆச்சரியத்திற்குக் காரணம் என்னவென்று எனக்கு அப்பொழுது தெரியவில்லை . இப்பொழுது உன் கடிதத்தைப் பார்த்தபோது தான் அந்தக் காரணம் எனக்குத் தெரிந்தது .

’ ’ எந்நேரம் பார்த்தாலும் ஈஸி சேரில் சாய்ந்து கொண்டு , எப்போதும் வாய் ஓயாமல் இருமிக் கொண்டிருக்கும் உன் கணவரை இரண்டு நாட்கள் என்னால் பார்த்துச் சகிக்க முடியவில்லையே . அவரை இரண்டு வருஷங்களாக நீ எப்படிப் பார்த்துக் கொண்டிருக்கிறாய் ? ’ கை நிறைந்த பொன்னைவிட கண் நிறைந்த கணவனே மேல் ’ என்பார்கள் . அப்படியிருக்க நீ எப்படி அந்த மனிதரைக் கல்யாணம் செய்து கொண்டாய் ? அவருக்குச் செய்யும் சிகிச்சை போதாதென்று அவருடைய நாலு குழந்தைகளையும் வேறு கட்டி அழுது கொண்டிருக் கிறாயே . நிஜமாகவே நீ அவருக்கு மனைவியா யிருக்கிறாயா ? அல்லது அவர் வீட்டு வேலைக்காரியா யிருக்கிறாயா ? - இத்தனை கஷ்டத்தில் சிக்கிக் கொண்டிருக்கும் நீ எப்பொழுது பார்த்தாலும் எப்படி மலர்ந்த முகத்துடன் இருக்கிறாய் ? அந்த ரகசியத்தை எனக்குச் சொல்லித் தான் தீரவேண்டும் ’ ’ என்றெல்லாம் நீ உன் கடிதத்தில் எழுதியிருக்கிறாய் . இதோ , அந்த ரகசியம் என் கதையில் இருக்கிறது .

சென்னையில் நான் படித்துக் கொண்டிருந்தபோது எனக்கு ஒரு சிநேகிதர் கிடைத்தார் . அவர் எனக்கு எப்படிச் சிநேகிதமானார் . அப்புறம் எப்படிக் காதலரானார் என்பதைப் பற்றியெல்லாம் இப்பொழுது நான் சொல்லத் தயாராயில்லை ; அப்படிச் சொல்வதும் அவசியமில்லை . வைத்தியப் பரீட்சைக்குப் படித்துக் கொண்டிருந்த அவர் , ஹாஸ்டல் வாசத்தை விரும்பாமல் ஒரு தனி அறை எடுத்துக் கொண்டு வாசஞ் செய்து வந்தார் . எல்லாக் காதலர்களையும் போல நாங்களும் கடைசியில் கல்யாணம் செய்து கொள்வதென்றும் , இல்லாவிட்டால் பிராணனை விடுவதென்றும் தீர்மானம் செய்து கொண்டிருந்தோம் . இந்தத் தீர்மானத்தை நாங்கள் கை விடும்படியான ஒரு சந்தர்ப்பம் என் வாழ்க்கையில் நேர்ந்தது . என்னுடைய தங்கை தவமணியை உனக்குத் தெரியும் . அவள் குருடி என்பதையும் நான் உனக்குச் சொல்லித் தெரிய வேண்டியதில்லை . அவளுடைய கல்யாண விஷயத்தில் ஒரு தகராறு இருந்து வந்தது . அழகில்லை என்பதற்காக அவளைப் பார்க்க வந்த வரன் வீட்டுக்காரர்களெல்லாம் கண்ணை மூடிக் கொண்டு வரதட்சணை கேட்டனர் . அப்படிக் கொடுத்தால் அவளுக்கு அழகு தானே வந்துவிடுமென்பது அவர்களுடைய எண்ணம் போலும் கடைசியில் ஒரு சம்பந்தம் வந்தது . நாலுபிள்ளைகளுக்குத் தகப்பனாரான பின் தன் மனைவியைப் பிரிந்த ஒருவர் , என்னை இளையாளாக அடைய இஷ்டப்பட்டார் . அதற்குச் சம்மதித்தால் அவர்தம்முடைய தம்பிக்கு என் தங்கையை வரதட்சணையில்லாமல் கல்யாணம் செய்து வைப்பதாக வாக்களித்தார் .

அப்பொழுது என் தங்தை திருவாங்கூர் பாங்கியில் பணம் போட்டு மோசம் போயிருந்த சமயம் . மேற்சொன்ன சம்பந்தத்தை நிராகரிப்பதா யிருந்தால் பணம் நிறையத் தேவை . அதற்கு வழியில்லாத அவர் எந்த விதமான முடிவுக்கும் வர முடியாமல் திணறி , எனக்குக் கடிதம் எழுதி என்னை அபிப்பிராயம் கேட்டிருந்தார் . அந்தக் கடிதத்தைப் படித்ததும் நான் எந்த விதமான நிலையை அடைந்தேன் என்பது இங்கே விவரிக்க முடியாத விஷயம் . ஒன்றும் தோன்றாமல் அந்தக் கடிதத்தை கொண்டு போய் அவரிடம் கொடுத்தேன் . அதைப் படித்த பிறகு அவர் நடந்து கொண்ட விதம் எனக்கு அளவில்லாத வியப்பையும் திகைப்பையும் அளித்தது . என் கண்களில் கசிந்து வரும் கண்ணீரைக் கண்டதும் , ’ ’ இதென்ன பைத்தியமா உனக்கு ? ஏன் அழுகிறாய் கல்யாணமென்றால் யாராவது கவலைப் படுவார்களோ ? ’ ’ என்று அவர் கேட்டார் . இதற்கு நான் என்ன பதில் சொல்வது ? பேசாமல் இருந்தேன் . அவரே மேலும் தொடர்ந்து சொன்னார் : " நான் சொல்வதைக் கேள் ; என்னைக் கல்யாணம் செய்து கொண்டால் எவ்வளவு தூரம் இன்பம் அனுபவிக்க முடியும் என்று கற்பனை செய்து கொள்வதற்குப் பதிலாக , எவ்வளவு தூரம் துன்பம் அனுபவிக்க முடியும் என்று கற்பனை செய்து பார் . டாக்டரான பின் எனக்கு நிறையக் கேசுகள் கிடைத்தால் தான் ஆச்சு . இல்லாவிட்டால் துன்பத்துக்குக் கேட்க வேண்டுமா ? அப்படியே கேசுகள் தான் நிறையக் கிடைக்கட்டுமே ; அதனாலென்ன ? துன்பந் தீர்ந்துவிடுமா ? ஒரு போதும் தீராது . உன்னிடம் ஒரு நிமிஷமாவது என்னை ஒரு நோயாளியும் பேச விடமாட்டான் . தூங்கும் போதுகூட , ’ ’ டாக்டர் ஸார் , டாக்டர் ஸார் ! ஆபத்து , ஆபத்து ! ’ ’ என்று எவனாவது வந்து கதவை இடிப்பான் . இரும்பு மனம் படைத்தவன்கூட அவன் இடிக்கு அசையாமலிருக்க முடியாது . எழுந்து போக வேண்டித்தான் வரும் . ’ ’ இதோ ஒரு நிமிஷத்தில் வந்து விட்டேன் ’ ’ என்று நான் உன்னிடம் சொல்லிவிட்டுப் போவேன் . ஆனால் , ஒன்பது மணி நேரத்திற்குப் பிறகு தான் திரும்பி வருவேன் . இம்மாதிரி சமயங்களில் உனக்கு என் மீது எவ்வளவு காதல் இருந்தாலும் அது காற்றாய்ப் பறந்துவிடும் .

“ இப்பொழுது உன்னை இளையவளாக அடைய விரும்புபவர் வேலையிலிருந்து விலகிய சர்க்கார் உத்தியோகஸ்தர் என்று இந்தக் கடிதத்தில் எழுதியிருக்கிறது . என்னை மறந்து நீ அவரைக் கல்யாணம் செய்து கொண்டால் எவ்வளவு சந்தோஷமாயிருக்கலாம் , தெரியுமா ? நாள் பூராவும் அவர் உன் பார்வையிலேயே இருந்து கொண்டிருப்பார் , அதனாலென்ன , அலுப்பு ஏற்பட்டு விடுமா ? அப்படி ஏற்பட்டால் நாலு குழந்தைகள் இருக்கவே இருக்கின்றன . அவற்றின் கள்ளங் கபடற்ற சேஷ்டைகள் உனக்கு எவ்வளவோ குதூகலத்தைக் கொடுக்கும் . என்னைக் கல்யாணம் செய்து கொண்டால் என் அம்மாவும் அக்காவும் செய்யும் கொடுமைகள் உனக்கு என்ன குதூகலத்தைக் கொடுக்கும் ? “ இன்னொரு விஷயம் ; கிழவனைக் கல்யாணம் செய்து கொண்டால் சீக்கிரம் விதவையாகி விடுவோம் என்று சிலர் நினைப்பதுண்டு ; நீயே சொல்லு ; வாலிபனைக் கல்யாணம் செய்து கொள்கிறவள் மட்டும் விதவையாவதில்லையா ? ’ ’ எல்லாவற்றையும் விட இந்தக் கல்யாணத்தில் இன்னொரு விசேஷம் இருக்கிறது . வாழ்க்கையில் தியாகத்தைப் போல் சிறந்தது வேறொன்றும் கிடையாது . செத்த பிறகும் வாழ வைக்கும் சிறப்பான குணம் தியாகத்தினிடந்தான் இருக்கிறது . அதுவும் உன் தங்கைக்காக இந்த அற்ப தியாகத்தைக் கூட செய்யவில்லையென்றால் மனித ஜன்மம் எடுத்துத் தான் என்ன பிரயோஜனம் ? ’ ’ பார்க்கப்போனால் ’ இந்த உலகமே என்னத்திற்கு ? ’ என்று எனக்குத் தோன்றுகிறது . அது இருக்கத்தானே நாம் வாழ்க்கை என்று ஒன்றை ஆரம்பித்து விடுகிறோம் ? அந்த வாழ்க்கையில் காதலென்றும் சாதலென்றும் கதைத்துக் கொண்டு கண்ணீர் விடுகிறோம் ? இன்பமென்றும் துன்பமென்றும் எண்ணி இன்னலுறுகிறோம் ? நீயே நினைத்துப் பார் எல்லாவற்றுக்கும் காரணம் நம்முடைய கற்பனை தான் . இந்தத் தொல்லை தொலைவதற்கு ஒரே ஒரு வழி தான் உண்டு அந்த வழி துன்பத்தையும் இன்பமாகக் கருதுவதே . என்ன நான் சொன்னதெல்லாம் புரிந்ததா ? " என்று கேட்டுக் கொண்டே அவர்தம் ஆசனத்தை விட்டு எழுந்தார் .

நான் ஒரு நீண்ட பெருமூச்சு விட்டேன் . " எல்லாம் புரிந்தது ஆனால் நீங்கள் … " என்று இழுத்தேன் ,

’ ’ நான் தற்கொலை செய்து கொள்ளமாட்டேன் . பைத்தியக்காரனாகவும் ஆகமாட்டேன் . சந்நியாசியாகவும் போகமாட்டேன் . வேறொரு பெண்ணை ஜம்மென்று கல்யாணம் செய்து கொள்வேன் . உன்னைக் கல்யாணம் செய்து கொண்டிருந்தால் என்னென்ன இன்பங்கள் அனுபவிப்பேன் என்பதற்குப் பதிலாக என்னென்ன துன்பங்கள் அனுபவிப்பேன் என்று கற்பனை செய்து கொள்வேன் . ’ நல்ல வேளையாக அந்தத் துன்பங்களெல்லாம் இப்பொழுது நமக்கு இல்லையல்லவா ? ’ என்று எண்ணிச் சந்தோஷப்படுவேன் . புதுமணப் பெண்ணிடம் நான் அனுபவிக்கும் துன்பங்களைக்கூட இன்பமாகவே பாவித்துக் கொள்வேன் . அதை எண்ணி யெண்ணி எனக்குள்ளேயே நான் இன்பம் அனுபவித்துக் கொள்வேன் . உன்னைத் தற்செயலாக எங்கேயாவது சந்தித்தால் என் சகோதரிக்குச் சமமாகப் பாவிப்பேன் .

’ ’ இதற்கு மேல் நான் அவரிடம் என்ன பேசுவது , கௌசல்யா ?

அந்த எனக்கும் சர்க்கார் உத்தியோகஸ்தருக்கும் கல்யாணமாயிற்று .
அவருடைய தம்பியும் என் தங்கையைக் கல்யாணம் செய்து கொண்டு தனிக் குடித்தனம் சென்று விட்டார் .

அவர் சொன்ன முறைப்படி என் வாழ்க்கையின் இன்ப துன்பங்களைக் கற்பனை செய்து கொள்ள ஆரம்பித்தேன் . என் கணவருக்கு என்னைப் பற்றியோ , என் அழகைப் பற்றியோ கவலை ஒன்றும் கிடையாது . அவருடைய கவலையெல்லாம் தம்முடைய குழந்தைகளை நான் சரிவரக் கவனிக்கிறேனா , இல்லையா என்பதில் தான் இருக்கிறது . எவ்வளவு மேலான குணம் ! என்ன பெருந்தன்மை!

’ ’ கண்ணம்மா ’ ’ என்று என் கணவர் என்னை அன்புடன் அழைக்கும்போது , அவருடைய அன்பில் நான் பேரின்பத்தைக் காண்கிறேன் . " அந்தப் பாழாய்ப்போன பேரின்பம் ’ ராஜாத்தி மாதிரி இருக்கும் உனக்கு எதற்கு ? ’ ’ என்று நீ என்னைக் கேட்கலாம் . ஆனால் , கௌசல்யா ! நான் அந்த இன்பத்தைக் கூடக் காணாமல் வேறு எந்த இன்பத்தைத்தான் காண்பேனடி ?

என் கணவர் என்னை எதிர்பாராமலே படுக்கையறைக்குச் சென்று விடுவார் . பின்னால் நான் பால் கொண்டு போய்க் கொடுப்பதற்குள் அவர் தூங்கி விடுவார் . நானும் அவரைப் போல நிம்மதியாகத் தூங்க வேண்டு மென்பதில் தான் அவருக்கு எவ்வளவு ஆசை!

என் முகத்தை என் கணவர் எப்போதும் மூக்கு முழியற்ற சந்திர பிம்பத்துக்கு ஒப்பிட்டுப் பழித்ததில்லை ; கண்களைக் கருவண்டுகளென்றும் , கன்னங்களைக் கோவைக் கனியென்றும் சொல்லி அவர் என்னை நகைத்ததில்லை . நீயே சொல்லு ; நான் அந்த வாலிபரான டாக்டரைக் கல்யாணம் செய்து கொண்டிருந்தால் , அவர் என்னை அப்படியெல்லாம் சொல்லிப் பழிக்காமலிருப்பாரா ?

சமய சந்தர்ப்பமின்றிச் சதா தம்பதிகளைக் கவனிப்பதிலேயே கண்ணுங் கருத்துமாக இருக்கும் மாமியார் , நாத்தனார் முதலியவர்களுடன் குடித்தனம் செய்வதை விட , இந்த நாலு குழந்தைகளுடன் கூடிக் குடித்தனம் செய்வது எவ்வளவோ மேலாயிருக்கிறது . அவை , " அம்மா ! அம்மா ! " என்று தங்கள் அமுத கானத்தால் என்னை அழைக்கும் போதெல்லாம் நான் என்னையே மறந்து இன்ப சாகரத்தில் ஆழ்ந்து விடுகிறேன் .

ஆகக்கூடி அவர் சொன்ன முறையில் நான் வெற்றியைத்தான் காண்கிறேன் . இது தான் என் வாழ்க்கையில் நான் மலர்ந்த முகத்துடன் இருப்பதன் ரகசியம் , கௌசல்யா

இது உனக்குப் பிடிக்கவில்லை யென்றால் , அதற்கு நான் என்ன செய்வது ?

இப்படிக்கு
உன்னை என்றும் மறவாத
கண்ணம்மா!

Katturai Pol ulladhu… kadhaiyin amsam sattru kuraivu dhaan… Nalla muyarchi… Vaazhthukal

1 Like